Verklagsreglur Sambands garðyrkjubænda um úthlutun og afgreiðslumáta styrkumsókna v/5. gr. aðlögunarsamningsins.

Eftirfarandi reglur eru samdar af Sambandi garðyrkjubænda og samþykktar af Fagráði garðyrkjunnar og Garðyrkjumiðstöð.

Umsóknir þarf að meta á faglegan og kerfisbundinn hátt til að aðilar viti fyrirfram eftir hverju er farið.  Við mat á umsóknum getur þurft að taka tillit til veltu fyrirtækisins og þess hvort viðkomandi hefur áður fengið úthlutað styrk samkv. 5. gr aðlögunarsamningsins.  Samþykki fyrir styrkveitingum skal vera skriflegt.

Grundvöllur aðlögunarsamningsins er að efla beri ræktun á íslensku grænmeti og kartöflum.  Þess vegna eru eingöngu veittir styrkir vegna íslenskrar framleiðslu.  Það þarf því að koma skýrt fram við sölu og framsetningu vörunnar að um íslenska framleiðslu sé að ræða.  Samband garðyrkjubænda hefur látið sérhanna svokallaða fánarönd til þessara merkinga og setur sem skilyrði fyrir styrkveitingum að hún sé notuð, eða önnur merking sem tilgreinir rækilega að um íslenskt ræktað grænmeti sé að ræða og stjórnin metur fullnægjandi.  Stefnt er að því að árið 2008 verði allar merkingar með fánarönd SG. 

KYNNINGAR

Styrkumsóknir eru metnar á grundvelli áætlunar kynningaraðila.  Ætlast er til að umsækjandi greiði sjálfur a.m.k. krónu á móti krónu í hvert verkefni.  Ekki eru styrktar beinar auglýsingar eða heimasíðugerð fyrir einstaka aðila.  Skilyrði fyrir að auglýsingastyrkur sé veittur er að auglýsingin sé í nafni íslensk grænmetis í heild og/eða í framhaldi af viðurkenndri vöruþróun og að fánarönd SG sé notuð eða önnur merking sem tilgreinir rækilega að um íslenska framleiðslu sé að ræða og stjórnin metur fullnægjandi.

RANNSÓKNIR

Styrkir vegna rannsókna/tilrauna geta numið allt að 50% af kostnaði við rannsóknina/tilraunina.  Einungis er miðað við að styrkt sé til að greiða fyrir þá vinnu sem unnin er fyrir viðkomandi verkefni.

ÞRÓUN

Meginreglan er sú að fyrirtækjum sé hjálpað að þróa vörur (aðkeypt vinna) en vélakaup einstakra fyrirtækja eiga að standa undir sér sjálf.  Um styrki þarf að sækja fyrirfram, þ.e. áður en vöruþróunin hefst og leggja fram krónu á móti krónu í hvert verkefni.  Krafa er að verið sé að styrkja íslenska framleiðslu.  Ársreikningar umsækjanda geta verið nauðsynlegir til að meta bolmagn hans.

1. Til að hægt sé að meta umsóknina þarf að liggja fyrir hvaða vöru á að þróa.
2. Sjóðnum er ætlað að styrkja bæði nýjungar og áframhaldandi þróun.  Ekki er nóg að umsækjandi ætli í markaðssókn.  Það þarf að vera um raunverulega vöruþróun að ræða.
3. Ef stjórnarmenn eiga beinna, fjárhagslegra hagsmuna að gæta í einhverju þeirra fyrirtækja sem sækja um styrki víkja þeir af fundi þegar umsóknir þeirra fyrirtækja eru metnar.  Trúnaðar skal gætt í meðferð upplýsinga frá fyrirtækjum.
4. Forsendur fyrir að styrkur sé veittur er mat á hverju verkefni fyrir sig.  Ef sú staða kemur upp að fleiri en einn sækja um fyrir sömu vöruna þarf að meta hvort fyrirtækin hafi bolmagn til að fylgja þróuninni eftir til enda.  Ef niðurstaða mats er sú að báðir/allir séu hæfir og metnir nokkurn veginn jafn hæfir, getur komið upp sú staða að ef allir verði styrktir nái enginn þeirra nægilegum markaði til að varan geti gengið.  Ef mat dugir ekki til að skera úr um þetta má láta hlutkesti ráða því hver hlýtur styrk.  Þeir sem sækja um til þróunar fleiri en eins verkefnis forgangsraði verkefnunum.
5. Sama vöruhugmyndin er að hámarki styrkt tvisvar.
6. SG heimsæki umsækjendur.

ENDURMENNTUN

Styrkir vegna ráðunautaheimsókna nema útlögðum kostnaði og launakostnaði viðkomandi sérfræðings.

Ráðunautaheimsóknir

Sækja þarf um ráðunautaheimsóknir fyrir 1. nóvember fyrir næsta ár á eftir.  Ef umsóknir um styrki koma upp eftir að áætlun hefur verið gerð verður að meta þær hverja fyrir sig og með hliðsjón af því hvort fjármunir eru eftir til úthlutunar eða ekki.   Þegar búið er að samþykkja ráðunautaheimsóknir gerir ráðunautur áætlun og skipuleggur heimsóknir næsta árs.

Kynnisferðir bænda

Styrkir til kynnisferða geta numið allt að 150.000.- kr. á hverja garðyrkjustöð á ári.  Ætlast er til að kynnisferðir séu fyrst og fremst skipulagðar af faghópum og/eða ráðunautum.  Heimilt er að veita styrk til að greiða ferðakostnað ráðunautar og/eða framkvæmdastjóra SG.

GREIÐSLUR fara fram eftir að verkefni eða áfanga verkefnis lýkur og niðurstöður hafa verið samþykktar af Sambandi garðyrkjubænda.

Hafi styrkur ekki verið sóttur innan 2 ára frá samþykkt hans fellur hann sjálfkrafa niður.

Þessar reglur verði birtar á vefsíðu Sambands garðyrkjubænda og í auglýsingum um styrkumsóknir vísað í þær.

Breyting var gerð á verklagsreglum þessum á stjórnarfundi Sambands garðyrkjubænda 5. júní 2009.